分享至微博
分享至 Facebook
列印

陳振聰受浸 緊張過結婚

03 - 07 05:00

被質疑為「洗底」 無唔開心

【明報專訊】面對爭產官司纏身嘅陳振聰,早排話自己信咗基督教,由Tony改名做Peter,準備4月受浸,點知原來佢前晚已經喺青衣阡陌浸信會,由林以諾牧師主持儀式,提早受浸費事被騷擾咁話。對於被指信教係為咗「洗底」,陳振聰話無因為咁而唔開心,因為已經得到最大救恩,經歷到神,有咗永遠盼望。

林以諾主持 陳志雲唱詩

陳振聰被控偽造同行使假嘅龔如心遺囑,案件最快5月底正式開審。佢接受咗商台《1圈圈》訪問,話受浸當晚有成70幾人出席,全部都係親自邀請,包括親友、教友,仲有商台行政總裁陳志雲唱聖詩,但身在溫哥華嘅大仔,就因為買唔到機票返嚟親眼觀禮,有少少遺憾。

睇嚟阿Peter都幾開心,連招牌哨牙笑容都出埋,話係「一生人最開心一日,好緊張,重生喎,仲緊張過結婚,新嘅開始」,又話出席藝人徐淑敏同老公黃浩都係佢隻「羊仔」,相信會好快信主喎。

阿仔唔再叫Wealthee

陳太譚妙清一直熱淚盈眶,話老公信教後有轉變,多咗同仔女溝通相處,又無咁,開心舒服咗。個訪問今日仲有下集,陳振聰承認過去婚外情唔啱,希望未來會做好。

陳振聰透露大仔陳酉樺(Wealthee)家都改咗英文名,費事同錢有關,又認為仔女一直嘅包容超越埋怨。

分享至微博
分享至 Facebook
列印
關鍵字:港聞
新浪推介