分享至微博
分享至 Facebook
列印

高效能嚴師

02 - 27 14:36
避風塘炒澳洲大肉蟹(時價),惹味鮮味共冶一爐。
避風塘炒澳洲大肉蟹(時價),惹味鮮味共冶一爐。
4 / 16

名導演嚴浩近年著有《嚴浩特選秘方集》,以「偏方不自秘,療效齊分享」為宗旨,與讀者交流健康秘方,極受香港人歡迎。導演即將同譚凱琪(Zoie)合作主持「有線」節目《食德好.嚴浩偏方》,繼續為香港人提供保健貼士。今晚我誠邀導演同Zoie,去到位於佐敦0既「佐敦大排坊」,同大家分享保健秘方之外,亦介紹一下呢一間隱世美食店。

「布緯」治百病

我同導演一碰面,佢即以:「飲酒係我0既生活。」打招呼,哈哈哈!咁我就先同導演乾杯!乾!

話雖如此,導演近年以養生、保健方法撰寫專欄,仲推出著作。「現代人太過幸福,但太幸福都會出毛病,呢個毛病就係懶。懶到連自己健康都完全徹底地交託0係醫生手中,如果係意識到生活方式對健康0既重要,就係將健康掌握0係自己手上面開始。」

哈哈哈!導演2012年初就力推布緯食療(The Budwig Diet),成為坊間新興食療,「呢個並非新興起0既自然療法,係由知名德國生物化學家Dr. Johanna Budwig0係50年前研究出0黎,可令癌症容易治癒0既食療。

「食療係服用以有機冷壓初榨亞麻籽油(Organic Cold-pressed Extra Virgin Flaxseed Oil)混合有機原味低脂茅屋芝士(Organic Low-fat Cottage Cheese),可以有效改善細胞組織,預防同治療好多同免疫系統有關0既慢性疾病,尤其是癌症。」

導演話,現時因為食療大熱,唔少人買唔到相關材料。「其實可以上網,去香港心腦保健會訂購(hkeecphc.blogspot.hk)。」

保健兩貼士

「布緯食療」外,導演即席教「Paco巨星飯堂」0既捧場客,穩定血壓同令頭髮再生0既自然方法。

「血壓高0既患者,可以0係得閒0既時候搓手(見左圖),因為手掌上0既反射區多,搓手產生熱力,刺激身體、穩定血壓,但要持之以恒。

「至於生髮,可以每日用肉桂粉、蜜糖同橄欖油混合,肉桂粉可落多少少,然後按0係頭皮上,刺激毛囊,等20至30分鐘之後清洗。大概個零月,頭髮就開始生長。」

除0左兩個簡單實用0既方法,導演講0左3大飲食之道:「1、紅肉要少食,包括豬、牛、羊肉等。結腸癌同飲食有密切關係,每天食用熱狗和豬、牛、羊肉以及肉製品的人,患結腸癌的概率高於一般人。

2、唔好過量飲酒。過量飲酒會增加患乳腺癌、結腸癌、食道癌、口腔癌同咽喉癌0既危險。

3、脂肪含量高0既食品要少食。高脂肪食物唔單止令人容易患心腦血管疾病,亦都會容易患癌。」

古法通血管

導演0既錦囊停不了,仲有一個古方通血管食療:「呢個通血管古方,係來自一位患者,佢有3條心血管已經嚴重堵塞,需要做搭橋手術,手術0既時間係一個月之後。0係呢個期間,佢食0左一個月呢個古方。一個月以後佢去同一家醫院做檢查,發現3條血管乾乾淨淨,原來塞0既地方已經全都通晒。」(詳見下表)

今晚有導演提供各式保健方法,臨走前佢再醒多大家一招:「好似今晚咁,食得咁豐富,最好0係飯後,用半個檸檬,榨汁混合45。以下0既暖水,飲落肚,檸檬就開始做0野!」

哈哈哈!導演今晚畀0左咁多保健貼士我,我以酒會友啦!乾!

今晚我同導演(右)、Zoie呢一對《食德好.嚴浩偏方》0既拍檔,細談保健心得。

我同導演酒逢好酒腳,淺嘗暢談一樂也!

Zoie有親自試用「布緯食療」,佢話:「食0左一個月,皮膚比之前好,而且人亦都精神0左。」

我話餐廳係隱世美食店,全因廚師班底為昔日「新兜記」人才,呢味米通石斑塊($108),盡顯功架。

即燒乳豬($168例牌/$638一隻),皮脆肉嫩。

辣酒煮花螺($128)辣味並冇掩蓋螺鮮,一流!

Zoie表示,同導演合作主持節目,獲益良多。

搓手係無時無刻都可以做到保健方法。

薑蔥四頭南非鮑魚(時價),極為鮮甜。

呢道豉油皇煎花竹蝦(時價),蝦鮮皮香脆,水準之作!

避風塘炒澳洲大肉蟹(時價),惹味鮮味共冶一爐。

導演話以肉桂粉、蜜糖同橄欖油混合品可刺激毛囊,仲示範按頭皮方法。

豉椒炒紐西蘭蟶子皇(時價),夠晒新鮮!

蝦子扒柚皮($88)係一道古法菜式,考驗大廚功夫。

《食德好.嚴浩偏方》將會0係今個星期日(6日)晚上7點播出,仲想向導演學0野,就要準時睇0勒!

通血管食療

材料:同份量的檸檬汁、薑汁、蒜頭汁、蘋果醋各一杯(250cc),蜜糖適量。

做法:1. 蒜頭去皮,薑去皮切小片,放入榨汁機榨汁,或者放入攪拌器打成漿,用網布隔渣,手絞出汁。

2. 將蒜頭、薑汁放入瓦煲,加入檸檬汁與蘋果醋,大火滾,小火慢煮,不要蓋鍋蓋,讓水分蒸發,大約需要半小時,剩下大約一半汁液。

3. 溫度降下後,加入蜜糖,仔細攪勻,蜜糖可能需要很多,主要是令汁液容易入口。

4. 將成品儲在有蓋的玻璃瓶中,放入雪櫃。每天早飯前空肚服用一湯匙。

協力☆吳靜 攝影☆蔡豪 設計☆黎志堅

分享至微博
分享至 Facebook
列印