【東方日報專訊】近排政府好似做騷做到上咗癮咁，繼成班司局長一個二個樂此不疲咁去演消費騷之後，家陣連食物環境衞生署及海關都好學唔學，有正經嘢唔做走去做一場掃蕩走私菜騷。
日前食環署食物安全中心以及海關打鑼打鼓拉大隊，搵晒成班記者去介紹文錦渡口岸檢查入境菜車情況，睇吓捉唔捉到一架半架走私菜車，結果係點？咁就梗係搵唔到啦，見咁大陣仗喺度查車，邊個會咁戇居自投羅網吖？
雖然掃蕩走私菜係食咗白果，見唔到菜裏頭收嘅係機關槍定冰鮮雞，但唔緊要，睇吓兩個部門點樣喺度示範卸膊大法，都算不枉此行。嗱嗱嗱，對於假來源證問題，食環署話已經向內地負責部門反映跟進，但得到嘅答覆係冇發現。
唔係啩，有立法會議員話喺去年同內地部門見過面，人哋都承認走私菜涉及假證、夾帶冰鮮雞、豬肉呢啲問題，但好一個食物及衞生局局長周一嶽，即刻入晒海關數，諗住咁就將責任推得一乾二淨。
好嘞，咁睇吓海關又點見招拆招呢？原來佢哋都係卸膊能手，有埋大堆數據，話喺過去一年，只係破咗兩單運菜車輸入未列倉單貨物嘅案件，只不過檢獲到幾公斤鮮雞肉同埋鮮豬肉咁大把，所以佢哋認為用菜車走私食物一啲都唔算係猖獗。
咁嘅解釋真係呃細路都呃唔到啦，檢獲到咁少走私食物，唔代表問題唔猖獗，計功夫茶話齋，係海關闊佬懶理，執法不嚴就真！
老實講吖，做埋呢啲咁嘅爛騷有鬼用咩，試問有邊個唔知呢個標籤制度，已經變咗做不法商人嘅免查通行證吖？傳媒一早詳細咁報道過，成個走私菜運港過程已經通晒天啦，政府要跟進容乜易吖。
事實上，業界已經試過多次通知食環署要求採取行動，亦促請中港兩地政府打擊非註冊農場蔬菜輸港，可惜港府繼續採取鴕鳥政策，周一嶽至今仍然唔當係一回事，不理不做，認真離譜。
據蔬菜批發商估計，走私菜嘅數量由每日十車，增加到近排嘅每日超過六十車，當中涉及嘅蔬菜差唔多七百噸。估計全港五大蔬菜批發市場受走私菜影響，近月已減少兩成菜車入場，各個批發市場嘅生意已經嚴重萎縮。
業界谷谷埋埋，終於忍無可忍，百架菜車尋日由長沙灣副食品批發市場出發，慢駛遊行到中環政府總部請願。業界警告，如果情況再得唔到改善嘅話，話唔定會堵塞紅磡海隧以及文錦渡添。
香港中門大開，毒菜無孔不入，業界固然係叫苦連天啦，最弊嘅係，走私菜源源不絕運送到菜商及食肆，農藥、重金屬及染色素呢啲有害物質，市民可能已經食食埋埋唔少！
唔該周一嶽咪再自欺欺人，淨係識得做騷，為市民健康着想，快啲做番啲實際嘢打擊走私菜，如果唔係，叫你食晒啲毒菜吖喇！
將港聞、娛樂及突發新聞傳送到閣下
email信箱。
| 見死不救未足奇 死亦難安最可悲 |
| 走私菜源源輸港 演爛騷自欺欺人 |
| 強過禁售期新例 隨時受挑戰 |
| 批發市場菜價遠超直銷菜 施壓求壟斷政府切勿腳軟 |
