【東方日報專訊】家陣金融海嘯愈演愈烈，知唔知全世界民眾最驚係乜嘢？佢哋最怕銀行有乜嘢冬瓜豆腐，令佢哋嘅存款一夜冇晒。咁各地政府最驚嘅又係乜嘢呀？最驚民眾對銀行體系冇咗信心。
咁又係嘅，如果市民對銀行體系冇晒信心，一有風吹草動，銀行就會發生擠提，市場就會動盪，所以各地政府都齊齊出招穩定人心。澳洲政府早幾日宣布，承擔銀行全數存款保障三年，新西蘭政府亦話會擔保所有零售銀行存款，為期兩年。
其實，多數歐盟國家一早已經咁做。其他國家就算唔係全數保障，亦大幅提升保障額，好似英國就提升到五萬英鎊。美國現時已將存款保障額提高至二十五萬美元，仲考慮改為全數保障，就連台灣都已經將保障額加到三百萬新台幣。
不過，返轉頭睇吓香港，銀行存款保障額一啲都冇加到，仲係十萬大元，同兩年前推出嘅時候一樣。班存戶都不知幾閉翳，家陣風大浪大，邊夠保障呀，如果辛辛苦苦捱咗幾十年，卒之搞到血本無歸，叫佢哋收尾嗰幾年點過？
咁就奇嘞，政府咪講過，會用盡所有彈藥穩住金融系統嘅咩？財爺曾俊華亦話，依家最重要係令市民恢復信心。提高銀行存款保障額，就係派咗定心丸畀民眾，金融系統亦會穩定番，政府唔使咁頭痛，一家便宜幾家着。咁簡單嘅道理，政府唔通都唔識？
聽講政府以為歐盟各國同澳洲為私人存款做全數保障，係驚資金流走，但係家陣本港仲未有大量資金流走，所以唔使做全保喎。唔怪之得政府成日畀人狂炳後知後覺啦，如果其他地區存款保障額提高咗，香港冇提高，一有乜嘢依郁，市民就會將啲錢轉走。政府依家唔做嘢，等到嗰陣先做，仲留得住啲資金咩！
話時話，政府都唔知點諗嘅。曾俊華同金管局總裁任志剛呢排咪猛喺度唱好香港嘅，又話香港銀行體系好穩定，資金好充裕，又話政府根本唔擔心銀行有問題。既然係咁，反正銀行唔會冧，存款保障額加到幾高，政府都唔使賠錢，咁着數嘅事，政府點解都唔肯做吖？
所以有立法會議員建議，政府應該即時宣布提高保障額，增強存戶信心，反應太慢，就會引起信心危機，佢哋建議提高到二十五萬。計功夫茶話，如果提高銀行存款保障額可以提升市民嘅信心，莫講話加到二十五萬，就算全數擔保又何妨？
好嘞，滙豐銀行執行董事王冬勝尋日透露，金管局已就銀行存款保障議題做調查。唉，反應永遠慢幾拍！
最搞笑嘅係，任志剛尋日喺立法會仲話，政府對金融海嘯唔係後知後覺，而係先知先覺。係真定係假，睇吓政府點處理存款保障就知嘞。
