【東方日報專訊】雷曼爆煲，唔少買咗相關迷你債券嘅市民畢生血汗錢隨時冇晒，特區政府開頭見死不救，後嚟為咗甩身自保，度咗一條屎橋出嚟，明屈分銷銀行同埋證券行回購苦主嘅債券。
尋日香港銀行公會討論回購事宜，雖然佢哋聲稱多數銀行都對回購建議「反應正面」，但由於債券結構複雜，銀行需要時間先至可以作出最後決定。
你話幾得人驚吖！連銀行公會都話複雜，因乜事又可以隨便向小市民推銷呢？道理好簡單，咪就係成班財金官員一直發緊夢，冇監冇管囉！
等功夫茶講吓其中一宗悲慘個案吖。話說有個文盲婆婆同佢個患精神病嘅仔相依為命，本來佢哋有一筆血汗錢做咗定期存款，一直無風無險好好地，點知畀銀行職員得閒又游說吓，得閒又落吓嘴頭，唉，對於呢兩母子嚟講，又點睇得明乜嘢叫「環球企業相聯可贖債券」吖。銀行不但推銷，仲評估佢哋可作中高風險投資添，於是呢對母子前後三次共斥資五十六萬蚊買咗債券，睇怕依家筆錢真係凍過水。
唔理銀行咁樣推銷係有心抑或無意，問題係好多雷曼迷你債券嘅銷售對象都係退休人士，唔承受得高風險投資。佢哋係咪畀人誤導都好，銀行將呢啲咁高風險嘅金融產品推銷畀佢哋，當然係責無旁貸，不過，歸根究柢，政府監管不力，先至係罪魁禍首！
依家唔係一單半單個案，金管局接到有關雷曼兄弟相關投資產品嘅投訴都接到手軟，至今已經多達七千幾宗。
呢啲垃圾金融產品存在咗咁耐，一個二個財金官員都話唔知，講都冇人信喇！嗱嗱嗱，財經事務及庫務局局長陳家強到依家至話考慮設立監察機制，監察迷你債券嘅估值程序，增加透明度。等得佢嚟就死喇，咁多年嚟成班財金庸官白拎人工喺度做緊乜呀！
政府劑劑都係事後孔明，唔出事就唔做嘢，一有事淨係識得卸膊，一時話會增加資源調查雷曼迷你債券嘅投訴，一時又話如果有牽涉誤導成分一定深究。究佢條命咩，下下後知後覺，要呢個政府把鬼咩！
財政司司長曾俊華仲離譜，一係就潛水，一係就講埋啲風涼話，佢呼籲投資者要理性、冷靜喎。大佬呀，你條鬍鬚曾就話個個月有幾十萬人工袋啫，人哋就嚟成副身家都冇埋，臨老過唔到世，仲要睇住成班財金高官懶懶閒唔做嘢，叫人哋點冷靜呀！
政府監管銀行推銷手法不力，爆咗煲之後又推卸責任，成隻縮頭烏龜咁，煲呔曾唔係成日話「二十年來最好」，仲自賣自誇話係乜嘢國際金融中心呀、乜嘢同紐約倫敦並列為「紐倫港」呀，原來一個浪打過嚟，係咁不堪一擊㗎，咁嘅九流管治，收皮啦！
立法會內務委員會雖然否決成立調查委員會跟進雷曼迷你債券呢單嘢，但通過咗召開特別會議，叫晒成班財金官員出嚟解畫。希望議員新人事新作風，幫小市民大力捽吓呢班庸官，唔要求佢哋問責落台，至少都要鞠躬謝罪啦！
