【東方日報專訊】香港呢排實係撞咗邪，衰起上嚟有紋有路。嗱，呢幾日爆發諾沃克病毒，連殘奧選手村都被攻陷，挪威隊唯一物理治療師亦中招，簡直係國際醜聞！
咁仲未夠恐怖，最得人驚嘅係，神秘病毒肆虐香江，無處不在，而且專向兒童埋手，唔夠一個月就死咗五個細路。
好似早幾日有個六歲細路女，喺內地返嚟發燒兼嘔吐，去東區醫院求診，醫生係咁意開咗啲藥就打發佢返屋企。點知第二日情況惡化，去睇私家醫生，私家醫生覺得病情嚴重，即時轉介番東區醫院，可惜一到醫院已證實死亡。
諾沃克病毒加上神秘病毒，搞到人心惶惶，最弊嘅係，新學期啱啱開始，分分鐘病毒大爆發，所以間間學校都如臨大敵，家長更加提心吊膽，而私家診所亦提高警惕，唯獨係公立醫院懶懶閒，若無其事。好似六歲女童神秘猝死，公立醫院明顯涉及疏忽，但係衞生當局好似乜嘢都冇發生過。咁搞法，唔再爆大鑊嘢至奇。
奇怪嘅係，呢排發生咁多醫療衞生事故，嗰班高官居然集體玩失蹤。早幾日淨係見衞生防護中心總監曾浩輝出嚟唱獨腳戲，但講嚟講去都係三幅被，一時話仲查緊幾個細路嘅死因，一時又話搵唔到共同源頭，講咗等於冇講。
直至殘奧村出咗事，衞生署署長林秉恩尋日先被迫蒲頭，佢一味喺度讚殘奧村嘅衞生條件點好點好，但被問到幾個細路嘅死因，佢就實牙實齒話佢哋嘅病冇互相關連，真係九唔搭八。
話時話，病毒滿天飛，但點解唔見食物及衞生局局長周一嶽蒲頭嘅？公立醫院發生咁多事，死咗咁多細路，唔通唔關佢事？仲有吖，本港食物衞生亦問題多多，連殘奧選手村都賴嘢，更何況近排好多地方又鼠患成災。呢啲瓣瓣都屬周一鑊管轄範圍，佢居然可以置身事外，問你服未。佢咪好鍾意出風頭嘅咩？早排推介醫療融資，佢日日向傳媒噴口水，仲粉墨登場，自己拍埋廣告添。
其實大家心知肚明嘅，推行所謂醫療融資，向市民伸手，可以向老細領功，佢梗係叻唔切啦。但係今次就唔同，醫療衞生立立亂，一鑊接一鑊，鑊鑊都杰撻撻，佢仲唔學煲呔曾有事即閃咩！
果然，原來周一鑊閃咗去北京，尋日同康文署署長周達明一齊參觀殘奧會火炬接力，唔知幾風騷，仲話要為香港參賽運動員打氣添。原來做離岸局長咁梳乎，唔怪得佢話之你幾多細路畀神秘病毒害死啦。
不過冤有頭、債有主，係你嘅就係你嘅，就算周一鑊點樣扮烏龜縮埋個頭，呢隻鑊佢孭梗㗎喇！
| 風暴臨頭悔必晚 船到江心補漏遲 |
| 神秘病毒陷香江 離魂高官玩失蹤 |
| 政治光譜模糊 選民有票難投 |
| 選舉論壇猶如泥漿摔角 尋代議士考驗選民智慧 |
