每年的農曆大年初五，正是財神誕的日子，我的貴賓李丞責大師話：「初五是傳統『破五舊』的日子，很多人認為農曆年要等到十五才會丟棄新年用品，但其實初五也是相當合適的時候，將凋謝的年花，過時的舊物棄掉，破舊立新。」初五剛過，大家掉晒啲嘢未呀？
踏入鼠年，丞責話娛樂圈會有好多是非，不過聰明人就如孔明借東風，懂得利用機會，反而達到理想的宣傳效果。所以我一向強調，玄學並非導人迷信，預早了解大形勢，巧用天時，咁咪事半功倍囉！
金鼠新春伊始，我特別邀請李丞責為香港論大勢，也為香港娛樂圈把脈，佢話娛樂圈點可以無是非風浪呢，問題是點樣學孔明借東風，一借就成功！至於肖鼠的Theresa得大師指點，08年必定更上一層樓。
自強不息
唔單止娛樂圈有負面新聞，丞責話由07年年尾，每當別人問及來年市況，丞責都好有保留，「中國曆法以六十年為一個循環，每個循環的大形勢其實都類同。1941年日本偷襲美國珍珠港，策動自殺式攻擊，六十年後的2001年，紐約同樣遭遇自殺式突襲，也就是911事件，結果02、03年香港經濟陷入谷底；又，1947和48年發生國共內戰，中國大量資金流入香港，07、08年自由行旺盛，亦有大量資金自內地流入；1949年中國立國，外資擔心香港政局不穩，大量撤走資金，推算起來，六十年後的09年，情況令人擔心。」
如果大形勢是不可逆轉，丞責又有咩建議呢？他呷啖酒，說：「全球最唔受影響的會是南半球的國家，所以大家都對澳洲睇高一線，09年起各位可以考慮將資金投放於較平穩的澳元當保本。」凡事皆有正反兩面，只要大家有充足的防備，並積極面對，一切都可化險為夷。
丞責見我用薄餅皮包着香脆的北京填鴨，為我斟酒，並敬我一杯：「Paco我最欣賞你這種積極樂觀的態度，無論大勢是正面還是負面，你都好積極面對。當你知道事情未必順利，你反而會做得更多去克服；而當你知道時機恰當，你更放膽去做。」哈哈，知我者莫若丞責，我和大師投緣，他為我開命盤，結果發現我倆的命盤竟然有九成相似，難怪我倆理念如此相近，我講三成，佢已明白我的意思。
烤北京填鴨（$288/隻），我成日想搵新地方食烤鴨，這裡的烤鴨算有水準，最好係薄餅夠薄，但京𧩓唔夠粗無咁辛辣，好難配合我「北京人」的風格，一啖二鍋頭就蓋過晒?味！
江南四小碟：冰鎮芥蘭（$55/前）、四川口水雞（$68/中右）、南京鹽水鴨（$68/中左）、椒麻拌海參（$88/後），冰鎮芥蘭選最嫩的部分，鋪排特色，唔錯。鹽水鴨以花椒五香醃一夜，再以白滷水浸熟，凍食，香味十足。
京燒羊骨架（$138/六件/例），大件就大件，但略嫌肉大瘦，羊脂唔夠，少了羊的羶味。
糟蒸大鰣魚（$428/一邊，原條約三斤半），大鰣魚是上海黃浦江獨有的深水魚，出沒於鹹淡水交界，愈夠斤𠕇愈靚，用火腿片夾冬菇，再加酒糟、雞油、紹酒等同蒸半小時，唔怕魚骨多，會食得幾滋味。
今年跑出
我和大師結緣始於車公廟。原來丞責和我每年都會去西貢濠涌的車公廟拜神，每次我都會預訂最大的香以表我的誠心。「連續三年，Paco都同我爭！」丞責說。就係咁，我哋就愈來愈啱傾！
一道熱辣辣的石鍋魚香帶子蝦球老遠已傳來惹人垂涎的香味，這道菜式師傅利用了韓式的石頭鍋來烹調海鮮，我分畀Theresa和丞責，一齊趁熱食。
聽大師講大圍環境講咗咁耐，Theresa終於忍唔住要開口問自身運程：「大師我鼠年運程如何？」丞責說：「肖鼠者今年太歲三合，之前蛇、馬、羊年運勢較弱，但去年起已有反彈，需要好好把握，應該學習牛的特性，除了勤力，亦要像牛日出而作日入而息一樣，定立清晰的時間分配。」他呷淡酒，又說：「你應該要求好高，有時要適當地控制一下。」Theresa愕然：「好驚呀，真係畀你講中！」
丞責觀人於微，他說剛才見Theresa挾糟蒸大鰣魚之際，並沒有避開多骨位置，「證明你不介意在細微處花工夫，力求完美。」哈哈哈，丞責認真好嘢，等我舉一反三，我最怕食鰣魚，太多骨，最多食面的肉，對照我處事的作風，就係用心部署大方向而不拘小節，「呢啲就係大將的所為！」丞責和我乾。
石鍋魚香帶子蝦球（$288/煲/例），是特色川菜配韓式製法，選南澳十至二十頭大帶子以及新鮮大蝦配魚香、京𧩓炒，放入保溫力極強的韓式石鍋，別有風味。
椰香南瓜芋頭煲（$78/例），冬天芋頭當造，吃得多芋頭臘鴨煲，不妨試試這個，加入香甜的南瓜和椰汁、黃薑粉，帶點東南亞菜式的風味。
大師指點，我今年旺正桃花運，大利拍愛情片，哈哈哈，我一定全力以赴！
丞責告訴Theresa忌火利水，應唱傷感的歌，拍催淚的戲，以淚水贏取大家的歡心，將必事半功倍。
丞責與我結緣於車公廟，我最欣賞是他對玄學的見解，處處有根有據，一個字，高！
努力反擊
吃着軟滑粗針的火朣雞燉大白青翅，我說起本地近年的音樂事業，想大師指點一下：「八年前開始，香港樂壇受盡台灣音樂文化嚴重衝擊，一直堅持廣東歌的我感覺痛心，丞責你認為有甚麼方法可以扭轉形勢？」
「這未必與玄學有甚麼直接關係，我睇反而是一種因果關係。」丞責續說：「當年你帶領咁多天王天后衝擊台灣樂壇，台灣人看在眼裡，其實默默吸收。而我哋卻因為過去太成功而變得墨守成規，你睇我哋仲講緊四大天王！相反台灣的新力軍林林總總，一百個總有數個跑得出。但香港現在就缺乏像你這麼出力培育新人的帶頭人，新人未能承接，風頭自然被人家佔了。」
哈哈哈，丞責唔止玄學耍家，審時度勢的分析力都好強，培育新人係我也係成個香港娛樂圈嘅當務之急，好，我嘅金鼠年第一位新人，就係——李丞責，各位要搵大師開盤，先搵我，哈哈哈！
清真牛肉餅（$35/3件，午市點心，晚市需預訂），提起牛肉餅，好多人都會諗起九龍城清真牛肉館，這裡的的骰好多，咬落肉汁多到噴出來，唔錯。
火朣雞燉大白青翅（$1,988/約六位用），是海派傳統做翅的方法，將翅連同鮮香的火朣，即肘子、鮮雞，注入火候十足上湯，入鼎燉三小時，大白青翅夠粗針，質感亦軟滑，湯味極濃，女士或感過鹹，我一啖湯一啖威士忌，無問題。
綜觀香港呢一代的玄學家，丞責是最早出道與成名。點解唔似？大師自嘲：「因為我個樣生得細！」
Theresa現正忙於錄音，今晚辛辣嘢，一啲都無食，keep住最好的狀態，迎接新一年的工作。
儂南北廚房
地址：尖沙咀諾士佛台1號3樓
電話：3102 2923
飯局金句：識時務者為俊傑
下期預告：
方力申、Stephy、Miki、葉念琛和我與台灣女星曾愷洗塵，大談我的最愛。
