協力☆郭劍鋒、李詠雯 攝影☆黃叔榮 設計☆鄒上賢
在《東周刊》「金牌之選」頒獎禮上遇見一哥楊貫一，見他喜上眉梢，攞完特區銅紫荊星章，又眾望所歸奪得「金牌廚神」榮譽，正是雙喜臨門。今晚我就約齊港姐曹敏莉、葉翠翠，仲有國際中華小姐陳爽一齊來賀一賀一哥！
雖然一哥講過唔鍾意畀人神化，可以將「廚房佬」形象洗脫已經心滿意足，但我就話只係一哥為人謙厚，深明「滿招損，謙受益」的道理。我極之同意，所以我最多都係自封「金牌經理人」，唔敢叫自己「金牌經理神」，哈哈哈！
一哥楊貫一榮獲特區銅紫荊星章，表揚他對香港飲食文化的貢獻，領獎時，曾特首囑咐一哥煮好鮑魚為港增光，實有惺惺相惜之意。我今晚約齊港姐曹敏莉、葉翠翠，仲有國際中華小姐陳爽一齊來賀一哥，承諾我哋會盡情食好呢餐飯！
鮑魚以外
一哥主理的富臨飯店，名氣響噹噹，世界各地的老饕皆慕名而至，我曾經疑惑還需要我來錦上添花嗎？後來我想通了，去富臨唔一定要食鮑魚，其他各色小菜一樣有一哥的風範。老實講，名氣響有時會令大眾望而卻步，今晚我就要親口示範鮑魚以外的美食。
「唔係話賣貴嘢就叫得做名店，我哋每個菜式、每樣材料和每種做法，都要優勝過人。」一哥話鮑參翅肚固然係貴價食材，要悉心炮製，但簡單如一碟醬料都不能夠馬虎。「好似呢碟用來點鯪魚餅的蜆蚧汁，開封後要幾多即用幾多，因為蜆蚧一遇空氣就會變黑，用剩的唔可以再畀客人。」聽罷我即時夾件鯪魚餅點蜆蚧食，嘩，粒蜆肉大到可以送酒！
一哥話近年所有貴價食材來貨價以倍數上升，都係因為國內經濟起飛，供不應求。「二十頭網鮑成本要千七蚊，最靚的花膠維到萬八蚊斤，好多人誤會以為高檔食肆利錢深，其實非也，愈高檔，食材成本愈貴，客人食落肚嘅成數愈高。」第二個講我信六成，一哥講，我信十足，仲明白乜嘢叫物有所值，再加埋一哥同成班夥計的用心，咁就物超所值啦！
阿一桂花炒翅（每兩$260），用最靚的金山勾翅，加蛋、芽菜及生拆蟹肉，以火腿汁調味，瓦煲炒，乾身香口，貨真價實。
靈芝菇鮮蝦球（$150/例牌），鮮蝦剝殼炒，用蝦子吊味，清而不淡，鮮味無窮。
燒雲腿油泡肚尖（$150/例牌），取豬肚最嫩滑的椗，配以包了蛋炸的雲腿片，爽脆鹹香，送酒一流。
蜜味煎金蠔（$150/6至8隻），天然生曬至半乾濕的日本蠔，先以薑𧩓和燒酒蒸，去腥後用少許蜜糖煎至乾身，又香又有咬口。
水晶琵琶蛋（$150/例牌），瑤柱、蟹肉、土芹粒、蛋白加上湯，以湯匙盛而蒸之，成形後再煎，心思和味道皆一絕。
忍出彩虹
在座三位靚女，我最早識的是Mandy曹敏莉，佢同我講起近況。「去完紐約讀了一年珠寶鑑證重返TVB，參與了《舞動奇跡》比賽，雖然練到周身傷，但就學到好多嘢。月尾將開拍新劇，同劇有三哥（苗僑偉）同靚靚（袁詠儀），我就飾演女保鑣，要打口架，可能我跳舞生硬好似打功夫喇，哈哈！」
在我眼中三位都係未雕琢的寶玉，所謂玉不琢不成器，惟有爭取每個演出機會，做到最好，先至可以得到觀眾認同。正如一哥的金句：「人無我有，人有我優，人優我要更優！」翠翠若有所思，正在琢磨緊呢句話的深層意義。忽然，佢站起身話要同我乾一大杯，「Paco、一哥，好多謝你哋今晚請我哋食飯又提點我哋，呢杯一定要乾咗佢！」話口未完就喝個底朝天。我當然奉陪到底，反正啱啱食完一碗燜大鱔，正好用威士忌burn走啲fat！
飲完酒，我問翠翠最想演甚麼角色，佢諗咗一陣，「我想演奸角，仲要係大奸大惡嗰種，做鄰家女孩觀眾唔會記得。記得喺英國讀書時我一路追睇《創世紀》，對劇中的奸角好有印象。羅嘉良同我講：『要專心拍劇，等好的角色。』我會好好記住。」
坐在翠翠旁邊的一哥剛剛親手為我哋炒了個飯，回來聽見翠翠講起嘉良的一番話，好有同感。「未成功之前要忍。我年輕時，每次遇到別人不懷好意的責難，我就會咁樣回答：『等我遲啲至覆你。』我相信忍係可以出彩虹！」
好嘢！一哥，我以為我多金句，誰不知一哥一係唔開口，一開口就字字珠璣。忍出彩虹絕對係一哥入行五十多年來的智慧結晶，不過……我睇今晚就用唔着。
古法燜花錦鱔王（$1,100/份），我冬天的至愛，鱔肉又腍又滑，厚厚的皮膏，滋味養顏，蒜子火腩同燜，撈飯食一流。
阿一煎鹹蘇眉（約$75兩），蘇眉受保護，唔容易食到，要有牌先有供應。用鹽醃兩至三小時，以重物壓之使水分流出後煎，不失魚的鮮味，又帶煎魚的香口。
一哥教大家要忍，但今晚面對咁多美食，你話點忍？
（左起）曹敏莉、陳爽和葉翠翠問我點keep fit，我話早餐食十足，午飯就七成，晚飯五成就夠。佢哋異口同聲咁話：「惟有當呢餐係早餐！」
一種見識
一哥親手炒的飯香已經瀰漫成間房，你話叫大家點忍！唔食澱粉質的我都要破戒！一哥的招牌炒飯與其他的最大分別就是用瓦煲炒。瓦煲傳熱平均，但就無不𣁾鋼鑊咁傳熱，要慢慢炒，唔可以心急，一般用鑊炒分幾兩分鐘完成，用瓦煲要五分鐘，工夫多兩倍有餘。好的炒飯稱為金鑲銀，即每粒飯都要被雞蛋包裹着，但用瓦煲慢炒的一哥炒飯更可以將各種材料的香味互相滲透包容，每一啖飯都可以食到瑤柱、𧩓花、雞蛋、叉燒粒和火腿汁（富臨的菜絕不下味精，調味全用金華火腿汁）的味道，達致渾然天成的境界！一哥炒飯盛惠二百七十大元，價錢雖高昂，但值得，因為這碟飯還代表人優我更優的精神！
今日的高級食肆，稱得上豪客的，大部分是國內人。佢哋搵阿一係朝聖，指定食鮑魚等於我哋去巴黎一定要買LV。我要呼籲大家，全世界只出了一個阿一，佢係香港的故事，由廚房小工做到世界御廚，將香港飲食文化發揚全世界，一世人最少要食一次真正的靚嘢，尤其是對年輕的讀者來說，就算試一試家常小菜也是一種見識。我更建議新一代的父母一定要帶小朋友來試，不忘告訴小朋友阿一的故事，食完之後小朋友不停話要再嚟點算？咁就啱晒，叫小朋友努力上進，大個就可以餐餐食鮑魚！
阿一炒飯（$270/例牌），每啖飯都可以食到瑤柱、𧩓花、雞蛋、叉燒粒和火腿汁的味道，比金鑲銀更勝三籌。
一哥親自出手炒飯，呢碟飯我最少回味三日！
佳餚要配美酒，我的最新發現Highland Park 30年Single Malt，免稅店只售千九蚊左右，物超所值。
來自哈爾濱的陳爽在港日子尚短，如此非同凡響的粵菜還是第一次吃。曹敏莉也說食到最後的南瓜餡蒸包都充滿驚喜，兩人不能不來個合照。
翠翠站起身話要同我乾一大杯，話口未完就喝個底朝天，我當然奉陪到底！
富臨飯店
地址：銅鑼灣駱克道485號
電話：2869 8282
飯局金句：人無我有，人有我優，人優我更優。
下期預告：
金牌飯局２周年！
